Vaneddi senza sorti

VANEDDI SENZA SORTI


Abbanniava ciavuru di festa

u sfinciunaru fermu mmenzu o chianu

e attornu tuttu un sbardu di picciutteddi

a rispirari dda grazia di Ddiu.

I panara calati di li barcuna

cugghevanu grappi di pumadoru

e pampini di basilicò arrialati

mentri cchiù sutta davanti li catoj

linzola janchi isati cu li canni

parevano banneri

chi s’arrinnevanu a la fami.

Ah,chi miseria dintra ddi vaneddi

vaneddi senza sorti!

Eppuru tannu supra li cincu liri

c’era stampatu un grappiceddu d’uva

quasi na spiranza.

Ma li poveri avìanu a vinnignari

jurnati sani p’accucchiari na cartata di pasta

ntrusciata dintra li falara.

Ora a li casi ci sburderu l’arma

a li funtani ci scipparu puru li cannola

e li balati cummigghiati di munnizza

s’hannu a struppiari l’ossa

p’allungari na taliata supra li stiddi.


.