Le Poesie in dialetto siciliano

L’URTIMU FIGGHIU

Si ‘ntisiru tri corpa di scupetta

e ‘mmezzu a chiazza

si vitti càdiri un picciottu.

‘Nterra supra i sò libbra chini di sangu

parìa ‘n’acidduzzu sparatu dintra o pettu.

A vuci currìu di porta ‘nporta

“si nn’astutaru a n’autru

e cu cchistu sunnu setti” dicevanu

i cristiani ‘nsutta ‘nsutta.

Sula mmenzu a chiazza abbannunata

‘na vicchiaredda chiancìa dispirata.

Figghiu gridava figghiu

‘un ti nn’ jiri e tutti

nnò gran silenziu a stavanu a sintìri.

Ddoppu arrivaru machini e surdati

e a chiazza bluccaru

di tutti i quattru lati.

Muta rristò ddà puvuredda

mancu cchiù u cori sintia

nno so pettu mentri cchiù ddà

unu senza rispettu chi quasi

parìa Diu ‘mpirsuna vucciazzava

“livatila di ddà mannatila via

c’avemu a fari a fotografia !”

Chidda mischinedda ci pusò

lurtima carizza pò si staccò

senza cchiù tristizza

senza cchiù rancuri

avia lassatu l’arma intra o sò duluri

Tutti ci ficiru ala

l’omini cu cappeddu ‘mmanu.

Campani a marteddu battìanu luntanu.

“Vendetta trasversale. Tutto qua” !

dissi un ggiurnalista vinutu di fora

e sulu chistu scrissi

‘nto sò fogghiu senza muntuari

a matri e chiddu ch’era ‘nterra

l’urtimu fgghiu.

QUANNU VIDU

Quannu vidu l’aceddi

satariari nna la finestra

e li nuvuli nna lu celu fari pupi

quannu vidu lu suli

calari ‘mmenzu a lu mari

e tinciri di frauli li mè pinzeri

quannu vidu la luna janca

trasiri ‘mmenzu a li persiani

e sentu lu gaddu gridari all’arba

di spicciarisi ad addumari

lu so lampiuni

e lu ventu cantari ‘nna li sipàla

e lu marusu sgrasciari li spiaggi

cu lu so sali

allura m’addumannu

taliannu li stiddi c’ogni sira

nni cummogghianu

cu dda bedda trapunta

si veramenti miritamu

tuttu stu beni

si doppu senza mirudda

jnchemu tutti li gnuna di fumeri

SOGNU D’AMURI

Certi siri di ‘nvernu chinu

quannu fora chiovi e cu scuru

si va’ curcanu i cristiani

mutu mutu mi ‘nfilu dintra o lettu

pi sentiri l’acqua

chi sbatti nne canali.

E mi pari ‘n’armunia di tammurini

chi scrusciunu p’aiutarimi lu sonnu

e iu ci provu picchì stasira

haju ‘na cosa tutta mia di sunnari.

Ma u ventu ca nun sapi

di sti stori penza sulu

a sbattiri i pirsiani mentri u focu

s’addummisci leggiu leggiu

sutta a cutra argintata du braceri.

Ma quannu s’alluntananu li trona

e u micciu da cannila arriva o chiovu

sulu allura duci duci

sentu scinniri lu sonnu

e iu biatu mi mettu a vulari pi fari

‘na ‘mpruvvisata e mè pinzeri.

C’è l’amuri miu segretu

‘nta ddu pratu ritagghiatu

‘mmenzu o celu e idda e ddà

chi m’aspetta bedda comu u suli

appujata o tilaru du me cori.

U PATTU

M’haju a vestiri di liuni

almenu un gghiornu pi fari un pattu

cu ‘na certa Signura

avanti ca mi pigghia lu scunfortu.

‘Ntantu quannu veni ddu jornu

vogghiu essiri dintra

anzi stari comu un braceri

misu ‘nto menzu e cu tutti

li mè figgi attornu.

E fora ....fora na jurnatazza tinta

picchì iriminni quannu u suli

inchi di virdi tutti li pampini

nun vogghiu. Mentri o lustru da lampa

e cu tutti chi mi cuntanu cosi

comu si fussi nenti è megghiu.

Doppu a finuta vogghiu sentiri

a manu di mè muccheri

ca cu quattru cucchiarati di cinniri

mi cummogghia comu ... si putissi

arripararimi du friddu.

Scinnunu lacrimi di sali

e si chiantanu ‘nterra comu pali di duluri

e iu dintra dda jaggia d’amuri

mi fazzu nicu nicu comu ‘n’acidduzzu

ca persi a strata e nun sapi cchiù unni jiri.

Ma a rrisata di la Morti

gela l’ossa e allura stennu l’ali

e c’un savutu m’arrampicu ‘nto Celu.

VIDDANU ANTICU

S’arricampanu stanchi

li mula da zzappari.

Ciaccanu cu li zzocculi silenziu

ammulatu di occhi di fimmini suli.

‘Nta la strata a pinninu

s’annacanu li viddani supra li seddi.

Ammucciati nna li tisteri

parunu mascari di tiatru anticu.

Portanu fasci di ligna sicca

e vertuli di cavuliceddi e cicoria.

Fora di li porti

u focu di li tannùra annegghia li mura

e lu ciavuru di la pasta

ca si spraja pi l’aria

arricogghi da li strati li picciutteddi.

Inchi già l’ossa

rispiranu puru li travi.

‘Nta l’agnuni di li funnachi

quasi sbummicati di la terra

letti di pagghia arraffazzati

aspettanu pi ddari consulu

a ddi poviri schini agghimmati.

A li voti ‘nta lu scuru

suspira strani fujunu da li ‘ncagghi

di li porti. Nun scampanu a li cani.

Vita ‘nfami è chidda di li viddani

e lu gaddu nun aspetta mancu

ca si fa gghiornu prima di cantari !